Gerensia di EXTRA ta sumamente orguyoso di kada un di e trahadónan ku ta laborá diariamente, den oranan masha difísil ku ta anochi, pa tur mainta sigur for di 5 or EXTRA ta disponibel.
Loke ku EXTRA a skohe komo selebrashon ta pa kambia e korant manera pueblo ta deseá. Durante di un enkuesta ku EXTRA a hasi pueblo a indiká kiko nan tin gana di lesa mas, lesa ménos, kiko nan ke mira mas i mira ménos. Entre otro e promé stap tabata pa a kambia e portada den unu diferente.

E promé editorial;

E promé editorial di 1 di mart 1976 ku defuntu Eddy Oleana di EXTRA a skirbi den e promé EXTRA.

Editorial

Ta ku húbilo den mi kurason ku awe dia 1 di mart 1976 mi por a mira un di mi soñonan mas ambisioso bira realidat, pero n’e otro un banda ku un tristesa profundo mi tin di konfrontá e realidat aki, sin mi maestro mas grandi den e mundu aki:…mi papa, Jose Lorenzo Oleana, kende a fayesé aña pasá dia 8 di novèmber.
Ku e determinashon mi dilanti di sigui su konsehonan semper, kada mainta mi lanta for di mi kama, mi ta memorá su palabranan “fayo òf frakasonan nunka lo por poderá di mi, tanten ku mi determinashon pa triunfá ta sufisiente fuerte”.
“mM no mag faya nunka”, tabata entre otro un frase di e gran hòmber aki.

Awor ku mi a yega pa konfrontá e realidat, despues di tantu añanan di labor fuerte, di dia i anochi, ya kaba mi por nota ku soñamentu a terminá i ku lo mi tin di hasi uso di tur lokual ta na mi alkanse pa kontinuá ku e lokual mi a kuminsá awe.
Mi tin sigur, ku huntu ku mi, e staf redakshonal di EXTRA ta konsiente di nos responsabilidat ku nos a tuma riba skouder pa guia e pueblo aki. Den Mike Oehlers, Taffy de Jongh jr i fotógrafo Ruben Simoons, mi tin e garantia aki. Pero no ta e staf redakshonal so. Tur e sobrá personanan ku ta forma parti di EXTRA Productions tantu di atministrashon, distribushon i di benta a pone plena konfiansa den mi persona, pa por a realisá e proyekto aki. Ta lógikamente ku ta masha difísil pa desepshoná nan.
“EXTRA” no a ser fundá pa kibra niun korant, manera a ser insinuá infantilmente. EXTRA ta un proyekto ku mi a kuminsá realisá for di aña 1969 i ku a kulminá awe.

E maneho ku redakshon di e matutino aki lo hiba, ta unu kaminda nos lo no basilá niun momentu pa trese algu padilanti ku ta kontra interesnan di henter e pueblo aki. Paisnan, islanan den sentido bon i den sentido malu tin e periodismo ku nan meresé. E por wòrdu drechá únikamente di akuerdo ku e pueblonan progresá den desaroyo i moralidat.
EXTRA no tin i lo no tin tampoko afiliashon polítiko. Por sierto ku en espesial henter nos personal di redakshon ta a polítiko. Ta p’e motibunan aki mes nos tin asina bon relashon ku tur, mi ta ripití ku tur eksponentenan di partidonan polítiko.
Si un gobièrnu ta hibando un maneho bon, e ta haña su pluimpje serka EXTRA, pero si no…prepará! 
Interes di e pueblo aki, pa nos ta tur kos.

E redakshon di EXTRA ta 51% di e akshonnan A, lokual ta duna garantia ku difísilmente por penetrá dor di dje. Huntu ku nos sindikatonan ta partisipá di manera ku trahadónan di Kòrsou tin e mayoria práktikamente total di e empresa. I di akshonnan B, 51% den man di nos propio koleganan i resto pa e otro trahadónan na Kòrsou si nan ta interesá. I esaki ta un novem, pa Antia.
Nos lo tin di bai sirbi komo ehèmpel pa e pueblo trahadó di Kòrsou. Nos sa ku nan wowonan ta habrí riba nos i ta presisamente pa e motibu aki, pa medio di e espasio aki, lo mi ke hasi un yamamentu na tur trahadó di Kòrsou pa duna nos tur e kolaborashon posibel. Nos ta stima krítika…sea positivo òf negativo…pero kon tal ku e ta fundá….
Pero…. nos lo ke mustra tur nos kompañeronan den lucha, ku kaminda nan faya i tambe kaminda e lidernan obreril faya, nos lo hala nan atenshon debidamente.

Na e sektor komersial i industrial, na promé lugá lo mi ke hasi un gradesimentu p’e apoyo ENORME ku nan a dunami, pa realisá e proyekto aki. Boso lo por tin sigur ku lo mi yuda te kaminda mi por pa defendé boso interesnan, pero aki tambe ta konta e mesun polítika ku gobièrnu i mi kompañeronan, trahadónan den lucha ku kaminda den nos konsepto un kos no ta korekto EXTRA lo ta e promé pa hala boso atenshon.
E ortografia ku e redakshon di Kòrsou lo bai usa ta esun di Römer Maduro, koregí pa komishon Jonis. Naturalmente nos lo tin di bringa duru pa siña esaki, pero nos lo hasié….Di e manera aki EXTRA lo ta e promé korant na Antia ku ta anunsiá públikamente ku e lo hasi uso di e ortografia ya menshoná.

EXTRA lo ser abastesé ku notisianan di Aruba i Bonaire pa respektivamente Agensia arubana di notisia i agensia notisiero Multro. E agensianan aki ta kompletamente independiente, nan tin nan propio personal i únikamente ta abastesé EXTRA di notisia for di e respekto islanan ei. Editorialnan lo sali integralmente i tur responsabilidat ta kai riba e agensianan aki.
Nos a bai asina leu ku e agensianan aki lo por hasi uso di e ortografia ku nan ta deseá.
Den nos konsepto humilde, ta únikamente di e forma aki interes di kada isla lo por ser protehá mihó.
Finalmente mi ta spera ku e mesun kolaborashon ku mi a sabi di risibí pa asina tantu aña den mi labornan na radio, televishon i komo periodista, lo mi por sigui haña  di tur gremio di e komunidat antiano. Mi determinashon tei…i ku boso kooperashon NOS TUR lo logra.

Eddy F. Oleana (QEPD)

provided by WENSHOW™ www.wen-show.com